1Th 2 | PONPDN | STEP | PWE pein komail asa, ri ai kan, duen at pwaralan komail kaidin me so kadepa.

1 Thessalonians 2

1 PWE pein komail asa, ri ai kan, duen at pwaralan komail kaidin me so kadepa. 2 A murin at kamekam nan Pilipi o at kalokolok wasa o, duen me komail asa, kit aimaki atail Kot padaki on komail ronamau en Kot ni apwal laud. 3 Pwe at panapanaui komail sota wiaui ni kotaue, de samin, de widin. 4 Pwe duen kit ale san ren Kot en padaki ronamau, iduen at padak kin wiaui, kaidin pwen konekonlar ren aramas akan, a Kot me kotin kasauiada monion it. 5 Sota eu ansau me se linkapina komail, duen me komail asa, de norok kapwa, Kot me saun kadede en mepukat. 6 Se pil sota rapaki konekon ren aramas akan, ma re omail de ren akai. A se pan kak katoutoui komail, pwe kit wanporon en Kristiis akan. 7 Ari so, kit kin materok nan pun omail dueta li en kamait amen, me kin apwali na seri kan. 8 Iduen at non kin komail melel, se mauki katunole kin komail ronamau en Kot, a kaidin i eta, a pein maur at, pwe komail wialar kompoke pat. 9 Ri ai kan, komail kin tamanda duen at dodok o at apwal akan. Pwe se dodok ni ran o ni pon, pwen der katoutoui amen komail, o se padaki on komail ronamau en Kot. 10 Komail o Kot at saunkadede duen at makelekel, o pun, o inen re omail me poson akan. 11 O duen komail asa, me kit panaui o kamekamait amen amen re omail dueta papa men wia on na seri kan. 12 O se padaki on komail er, me komail en alu inen wei ta, duen me kon on Kot, me kotin molipe komail on pein a wei o pein a linan 13 I me se kin poden danke Kot, pwe ni omail aleer masan en Kot, komail aleer kaidin dueta padak en aramas akan, pwe duweta masan en Kot melel, me pil kin dodok nan lol omail me poson akan. 14 Pwe ri ai kan, komail ale saner momodiso en Kot akan nan Iudaa reh Kristus Iesus; pwe komail kamekame reh toun omail wei, dueta irail me kamekame ren Sus akan. 15 me pil kamatalar Kaun Iesus, o saukop akan, me re kaloke, o re sota konekon ren Kot, o re kin palian aramas akan karos. 16 O re kainapwi san kit, ender padak on men liki kan, pwe ren der maurela, pwe re kin kadirela dip arail ansau karos, a onion mi po ’rail. 17 A kit ri ai kan ni at doo wei san komail ansau kis ni pali war at, a kaidin ni monion it, se ap nantion o inon ion melel kilan mas omail. 18 I me se men pwar won komail, nai Paulus pan mepak o pan riapak, a Satan karompa kit. 19 Pwe is me kapore pat, de kaperen pat, de kapina pat? Kaidin komail mon Kaun patail Iesus ni a kotido 20 Pwe komail kalina pat o kaperen pat.